حصني راعي البرَد..

الترجمة لعنوان هذا البوست لغير الناطقين باللهجه الكويتيه  هي : ( حسني بائع الأيس كريم )
شخصيه مشهورة جدا ومعروفه جدا جدا لسكان الفحيحيل والصباحيه والحمدي بشكل خاص ولسكان المنطقه العاشره وضواحيها بشكل عام... تعرفت اليه في سنين طفولتي الغابره ايام الاسود وأبيض واليامااال ... لحظه لحظه لااحد يصدق :)
في اوائل الثمانينات تقريبا  وكان عمري تقريبا خمس سنوات وعند زيارتنا
 لبيت عمي العود ( ابوي محمد ) ونحن اعتدنا ان ننادي اعمامنا باسم ( أبوي )  ومرت عمي كنا نناديها باسم  ( مرت عمي ) اخااف صج  ب انناديها باسم امي !!
 ماااعلينا نرجع للسيد حسني والذي كان يمثل لي ولابناء وبنات العم صاحب أطيب قلب وأجمل ابتسامه بدون منااازع .. كان ذو بشره بيضاء ذو شعر اسود مجعد مليان الجسم يقترب من البدانه المحببه ( مادري اشلون اوصف بس ان شاءالله تفهمون وصفي الدايخ :) )
في تلك الايام الجميله ايام الورعنه البريئه اذكر انني كنت انتظر يوم الجمعه بفارغ الصبر للذهاب
الى الفحيحيل سيتي لتناول الغداء في بيت ابوي محمد ومن ثم الذهاب مع بنات الاعمام مشيا الى مخبز الصباح لشراء الكيك اللي عليه طبقه ورديه من السكر والتهامها بأسرع مايمكن حتى لايطلب مني احد قطعه ..( سقى الله ذيك الايام )
وعند الرجوع كان حسني يدور بسيارته البيضاء الصغيره وكل اطفال الشارع مثل القرود متعلقين بشكل بهلواني .. وحسني يغني لهم الاغاني الجميله وهم يرددون معه بكل فرح وسرور ( مااحلاها من ايام )
واذكر انه كان يعطينا البرد بلا حساب فرحته كانت برؤيتنا نضحك ونغني ونقفز امامه وفي يوم من الايام جاء حسني وكالعاده ركضنا للحصول على برد بوصابونه ذو الشهره الفائقه وبرد ابو علج الاشهر من نار على علم ... اخذت نصيبي من الصابونه ولكن ابو علج تقاطعوه بنات وعيال ابليس عيال عمامي وهناااااا (تااااااراااتااااتتتااااااتااااااااااا) << موسيقى تصويريه لزوم الاندماج :)
وهنااااااااااااااا  طنبت بالصياح أي رفعت الصوت بالصيااح جنه قارصتني حيه  وخرج ابوي وابوي محمد وابوي عامر راكضين من داخل الديوانيه ؟؟  وش بلاج ؟؟ علامج ؟؟ من طقج ؟؟!
ولاني احمل اسم امهم الغاليه كانت لي معزه  خاصه في قلوبهم ودلال لايخفى على احد عند ابواني ( جمع اب هههه)  وانا اكمل دور الدلع والدلال وهم مستمرين يمي علامج  لاتبجين فديتج ...
 قلت ابي برد بوعلج !!
هنا صاح ابوي محمد يااااااااااااااااااحصني عط ..... برد بوعلج !!!
وابتسم حصني وقال عطيتها ياعمي بس ابو علج والله خلص ...بس لها عندي احلا من ابو علج هذا ابو قلاص بالمكسرات ( عاد هني دخت هههه)
ومرت السنوات ....
وكنت بالسياره مع بنتي الصغيره واذا بي اشوف ( حصني ) واسسسسحب بريييك قوي اعتقد التواير تحتاج لسحكيه عقبه :) من فرحتي بشوفت حسني ........  وهنا كانت طايره عيون بنتي من الموقف والبريك قلت بصوت تخنقه العبره .. يابنتي هذا حصني راعي البرد  امحق زمن للحين وهو يبيع برد ؟؟ يعني هالدنيا وهالسنوات وللحين على نفس السياره ونفس الشغله ؟؟؟ هل توقف الزمن عنده ؟؟ ماتغير فيه اي شي الا شي واحد فقط وهو شعر الذي اصطبغ باللون الابيض ياااسبحااان الله
وبنتي ساكته وطايرتن عيونها ولسان حالها يقول الحمدلله والشكر امي استخفت!!!
سلمت عليه وقلت له ياااعمي حصني شلووونك تراني من بنات آل فلان وابوي محمد اللي بالفحيحيل قاااال اييييييييي يابنتي الله يذكركم بالخير وسالني عن عمامي وعن امي منيره ( جدتي ) وابوي فلاح ( جدي ) وعن امي وعن ابوي ... ماشاءالله كانت له ذاكره قويه وقعد يعدد لي جيران بيت عمي وجيراننا في بيتنا القديم ... واعطى بنتى تشكيله من البرد واقسم ان لاياخذ ثمنها مع حلفي عليه ان ياخذ ولكنه ابى ان ياخذها وقال هذي لبنت بنتي :) الله يسعدك دنيا وآخره ياحسني وين ماكنت ....

ملاااحظه ك طول هالسنوات كنت اعتقد انه مصري وقبل كم شهر عرفت انه كان فلسطيني :)
>> كنت ورعن خبل ايام الورعنه  استروا على ماواجهتوا :)